Daddy's Birthday Dinner ~ Part 2

< April 27th, 2010 ~ Tuesday >

今日係梓瑩daddy既正日生日,咁特別既日子一定要同梓瑩一齊慶祝,所以我哋放咗工之後,即刻返屋企接梓瑩,去西真食日本菜.我哋叫咗三文魚,六十幾元只得4塊仔,好貴!不過又好好味,仲叫咗鷄泡魚干,牛肉火喎,豬軟骨拉麵同A5和牛,一塊二百gram要五百幾元,老公生日,無所謂啦 @~@


我哋烚咗一塊三文魚俾梓瑩,又叫咗滑啫啫既烏冬,不過由於佢眼瞓既關係,只係食咗少少.食完嘢之後去咗遊樂場玩,梓瑩似乎克服咗玩滑梯既恐懼,玩得好開心又吾捨得走,不過只從返咗playgroup之後,學識服從,我哋叫佢同滑梯say bye,佢即刻同滑梯揮手講bye-bye跟我哋走喇.去埋滿記買甜品,我哋就好完滿咁返屋企喇 ^3^

近排鐘意同人玩乾柸

Daddy's Birthday Dinner - Part 1

< April 24th, 2010 ~ Saturday >

每年梓瑩daddy生日,婆婆都会為佢慶祝,今次我哋去咗十下十下,9點後$68位任食,又真係幾抵wo ^$^

遊挪亞方舟

< April 11th, 2010 ~ Sunday >

去南丫島時梓瑩第一次坐船,今次去挪亞方舟係梓瑩第一次搭巴士,回程時亦係第一次有人讓坐俾我(因為我抱住梓瑩),好多謝呢位好人叔叔 ^3^

我哋係挪亞方舟竟然逗留咗3个幾鐘,因為呢度好似迷宮咁,總係揾吾到想去既展館 @@" 我哋睇咗2个电影,其中一个係4D既,要戴特制既眼鏡,我以為梓瑩吾会戴个眼鏡,因為屋企都有个玩具眼鏡,每次戴都吾会超過1分鐘,但今次佢竟然戴足全程,仲眼得好投入,佢會伸手去捉嗰d好似会撞埋嚟既嘢,真係好搞笑 XDDD

个傻豬又跑又跳,玩得好開心 ^_^ 原本諗住去埋對面个馬灣公園,但5點鐘飲完支奶,佢就瞓着咗,叻殼我哋無帶車仔,我只好抱住佢瞓,抱到上巴士 ...... 返到屋企,我成身散晒 @!@

梓瑩第一次搭巴士

遊南丫島

< April 5th, 2010 ~ Monday >

今日約咗婆婆,公公,舅父Dick同Mag姐姐同遊南丫島,梓瑩第一次搭船,好彩無暈浪,不過佢應該吾知自己已經搭咗船,因為佢全程都掛住同Dick Dick & Mag Mag 玩,玩到顛咗,一上岸佢就瞓咗,於是我哋去咗食个晏,食完嘢,梓瑩亦瞓醒,我哋亦開始起行 ........  呢日南丫島实在太多人喇,連上落山都要排隊 #L#  去到罟古灣天后廟,廟前有一大塊空地,終於可以係度玩吓支泡泡槍喇 =D 有个細佬女走埋嚟話想借支槍玩,點知高度與角度既問題,支槍撞到梓瑩个額頭,梓瑩喊住揾我要我抱,雖然好搞笑,不過我都有d心痛 :-( 玩完之後,食埋海鮮就坐船返中環喇,一上船,梓瑩又做甜睡宝宝喇 ,雖然今日行到好攰,但真係好開心,因為係全家人一齊去玩,就好似家庭大旅行咁 ^_^

世界十大奇景之一 ~ 舅父餵梓瑩飲奶 XDDD

扭計要媽咪抱

梓瑩正式返Playgroup 喇

< April 10th, 2010 ~ Saturday >

經過兩次試堂之後,今日終於正式返學喇 ^^ 梓瑩今次好合作,叫佢sit down 就 sit down,吾会走咗去,只要老師一唱歌,佢就拍手跳舞. 今次老師考小朋友既都係梓瑩既強項.就係當老師叫小朋友个名時,小朋友要舉手叫"到",當老師問"nose", "mouth" "eyes",小朋友要指俾老師睇係边度.至於今堂既勞作,係用益力多樽貼上好多貼紙,然後加一塊棉花再加入好多綠豆,返到屋企就由父母淋水,希望快d発芽啦 ^_^

放學之後,就去荃灣飲表弟既滿月酒,梓瑩今日好乖,返完學應該巳經好攰,但佢仍然同圍同人碰柸 say hi. 呢个囡真係一个親善大使 ^_^

貪靚妹

女仔的確係貪靚d架! 有時同佢冲完涼,着靚衫準備去街街,佢会指住自已件衫同我講"靚靚", 同佢梳頭紥辮仔,佢会坐定定吾郁任你整佢d頭髮 ...... 今日買咗衫仔同鞋仔俾佢,我續件攞俾佢睇,有d
佢無乜反應,但當佢見到件白色bear bear衫仔,佢即刻搶咗,仲併上自已身上,整古整怪,睇怕第時要帶佢一斉去shopping,俾佢自已揀衫至得喇 !

梓瑩與Ocean & Nana 姐姐有个約會

< April 4th, 2010 ~ Sunday >

今日約咗Lee姨姨, Ocean 姐姐 & Nana 姐姐,因為佢哋6号要返美国喇,一年後至会再返嚟. 今日最開心既係梓瑩,因為有得玩又有礼物收. 我哋約咗係沙田UCC Coffee Shop 食lunch,竟然撞到 Blog 友 Emily 帶埋軒軒去食lunch,不過軒軒瞓咗覺,無得影相tim ><

食完嘢就去咗Snoopy world影相,坐船同攞波波,傻豬梓瑩同兩个姐姐玩得好開心,Ocean姐姐又好照顧梓瑩,真係好乖女 ^3^